2026 йил 6 апрель куни Ўзбекистон Республикаси Савдо-саноат палатасида маслаҳатчи Алишер Шайхов ҳамда ТПП раиси ўринбосари Шахло Ибрагимова раҳбарлигида аёллар тадбиркорлигини тизимли ривожлантириш ва ҳамкорликни чуқурлаштириш масалаларига бағишланган ишчи учрашув бўлиб ўтди.
Учрашув давомида “Шарқ аёли” халқаро аёллар жамоат фонди томонидан аёллар тадбиркорлигини қўллаб-қувватлашнинг замонавий экотизимини шакллантиришга қаратилган концептуал жиҳатдан пухта ишланган ташаббуслар тақдим этилди. Асосий эътибор электрон тижорат инструментларини жорий этиш орқали бозорларга кириш имкониятларини кенгайтириш, шунингдек, молиялаштиришнинг очиқлиги ва имкониятларини ошириш ҳамда тадбиркорлик лойиҳаларини сифатли баҳолашга хизмат қилувчи скоринг механизмларини татбиқ этишга қаратилди.
Шунингдек, Ўзбекистон франчайзинг ассоциацияси томонидан амалиётга йўналтирилган ечимлар тақдим этилди. Улар синовдан ўтган франчайзинг моделлари ва кўпайтириш мумкин бўлган бизнес-кейсларга асосланган бўлиб, ушбу ёндашув барқарор бизнесларни масштаблаштириш, тадбиркорлик хатарларини камайтириш ҳамда аёлларни тадбиркорлик фаолиятига тезкор жалб этишнинг самарали воситаси сифатида баҳоланди.
Учрашув иштирокчилари давлат, ривожланиш институтлари ва бизнес ҳамжамияти саъй-
ҳаракатларини бирлаштириш аёллар тадбиркорлигининг ўсишини рағбатлантирувчи қулай ишбилармонлик муҳитини шакллантиришда стратегик аҳамиятга эга эканини алоҳида таъкидладилар.
Музокаралар якунлари бўйича томонлар комплекс ташаббусларни амалга ошириш, аёллар тадбиркорлигини қўллаб-қувватлаш ҳамда уларнинг лойиҳаларини миллий ва ҳудудий даражада барқарор ривожлантириш механизмларини яратишга қаратилган узоқ муддатли ва самарали ҳамкорликни йўлга қўйишга тайёр эканликларини билдирдилар.
Сайёра Атабаева
Отправить комментарий