2026 йил 26 октябрь куни «SHARQ AYOLI» Халқаро аёллар жамоат фонди ўзининг 27 йиллигини нишонлади!
Биз 27 йил давомида фуқаролик жамиятини ривожлантириш ва Ўзбекистоннинг равнақига ҳисса қўшиш, оилавий қадриятларни мустаҳкамлаш ҳамда хотин-қизларнинг бунёдкорлик ташаббусларини қўллаб-қувватлаш имкониятини бергани учун Яратганга шукрона айтамиз.
2026 ЙИЛ — ФОНД РИВОЖИДАГИ ТАРИХИЙ БОСҚИЧ!
Йилнинг бош халқаро ютуғи БМТ ЭКОСОС ҳузуридаги махсус консультатив мақомнинг олингани бўлди. Бу Фонднинг хотин-қизлар ва оилаларни қўллаб-қувватлаш, гендер тенглиги ҳамда барқарор ривожланишни илгари суриш бўйича кўп йиллик меҳнатининг тан олиниши ва Ўзбекистон тажрибасини жаҳон майдонида намойиш этиш имкониятидир.
Фонднинг бошқа муҳим ютуқлари:
2026 йилда: БААнинг «Taqdeer Award» давлат танловининг шорт-листига киритилди ва э’тироф олди — Фонд 1000 та иштирокчи орасида 3 та босқичдан ўтиб, финалга чиққан ягона аёллар ташкилоти бўлди.
2026 йилда: CRDF Global дастурига «Сунъий интеллект ва киберхавфсизлик» йўналишлари бўйича иштирок этишга таклиф қилинди.
Алоҳида таъкидлаш жоизки, Фонд 2022 йилдан буён электрон тижоратни ривожлантириш бўйича CLDP халқаро дастурининг экспертлар гуруҳига киради ҳамда Евросиёнинг 27 мамлакати вакиллари ўртасида ўтказилган «Энг яхши аёллар дипломатияси» халқаро танловида 1-ўринни эгаллаб, ғолиб бўлган.
ТАШАББУСДАН -ХАЛҚАРО ТАН ОЛИНИШГАЧА
Фонд 1999 йил 26 октябрда Ўзбекистоннинг Биринчи Президенти И. А. Каримов томонидан эълон қилинган «Аёллар йили» доирасида хотин-қизларни жипслаштириш, уларнинг фан, тадбиркорлик, инновация ва таълим соҳаларидаги салоҳиятини юзага чиқариш мақсадида ташкил этилган.
27 йил давомида «SHARQ AYOLI» давлат, халқаро тузилмалар ва бизнес билан ҳамкорликда ижтимоий лойиҳалар ҳамда стартапларни амалга ошириб келмоқда.
Бугунги кунда Ўзбекистон Президенти Ш. М. Мирзиёев томонидан хотин-қизлар ташаббуслари қўллаб-қувватланаётгани туфайли лойиҳаларимиз янги босқичга кўтарилиб, ўз географиясини кенгайтирмоқда.
ОЛДИНДА — ЯНГИ УФҚЛАР!
Биз учун бу 27 йил -инсонларга хизмат қилиш, ёшларни қўллаб-қувватлаш ва Ватанга бўлган муҳаббат йўлидир. Ҳар бир мукофот ва эътироф — бу жамоавий меҳнат, матонат ва аёлларнинг бунёдкорлик кучига бўлган ишонч натижасидир.
Қўллаб-қувватлаганлари учун барча ҳамкорларимизга, экспертларимизга, кўнгиллиларимизга ва дўстларимизга чин қалбдан миннатдорчилик билдирамиз.
Биз биргаликда яхшироқ келажакни барпо этмоқдамиз!
Фонд Бошқаруви номидан,
Саодат Турсунбоева
Отправить комментарий